1. Nasce este periódico ao serviço da liberdade de expressom, para defender o direito da cidadania à informaçom plural e honesta.

2. Nasce ao serviço da cultura, da literatura, das artes plásticas, da música, do cinema, do teatro, da ciência, da ética, da filosofia, da saúde, da ecologia, do desporto, do lazer, e quantas manifestaçons, produto da imaginaçom e da inteligência humana contribuírem para a solidariedade e o bem-estar geral. Nas suas páginas, serám dedicados espaços preferentes à informaçom e à reflexom sobre o idioma galego-português que nos une aos países do mundo da lusofonia.

3. Novas da Galiza é um periódico apartidista. Informará da maneira mais rigorosa possível e a partir da independência de partidos políticos, procurando reflectir a pluralidade da sociedade.

4. O jornal denunciará as contradiçons do actual processo de globalizaçom que se está a desenvolver com notórios abusos e desigualdades sociais a nível local e internacional. Especial atençom será dedicada aos sectores produtivos e ao ambiente.

5. O nosso é um jornal nom confessional e laico. Nas nossas páginas, dedicaremos especial atençom aos movimentos sociais que com os seus actos e propostas conformam a Galiza do século XXI. Informaremos dos grandes reptos do novo milénio: emancipaçom nacional, justiça social e redistribuiçom da riqueza.

6. Nasce o jornal para fornecer à cidadania a informaçom honesta, objectiva e independente. Nasce também a fim de cumprir umha funçom essencial do jornalismo: o exercício do contrapoder.

7. O jornal entende que a soberania nacional reside no povo galego. Alentará o debate social que conduza para a conformaçom do nosso país como umha naçom de pleno direito na Europa. Preside este meio o espírito nacionalista e de esquerda mais comprometido e leal, entroncando o nosso ideário com toda a tradiçom política do nacionalismo de esquerda.

8. As pessoas que conformamos este projecto comprometemo-nos com um jornalismo impulsionador do galego-português, nacional, aberto, unificador, independente de organizaçons políticas e de instituiçons, progressista, militante. Profissional, positivo e actual.