Quatro jornalistas galegas que se conhecêrom trabalhando noutro meio de comunicaçom deram em criar ‘ACousa’, umha revista para as millenial e a geraçom Z. ‘ACousa’ é umha revista audiovisual em redes sociais para a geraçom Z e Millennial galega, e as Cousas por trás de ‘ACousa’ som Bea Gutiérrez, Xulia Lomba, Yaiza López e Aida Vilariño, que decidírom criar un meio em que poder ler em galego os conteúdos que sempre fôrom do seu interesse.
Definides-vos como apolíticas, nom pensades que o pessoal e político?
O pessoal é político mas nós quigemos mantê-lo no âmbito privado. Como qualquer meio
de comunicaçom, temos umha linha editorial e nom a ocultamos, mas nom queremos
encaixar-nos dentro de qualquer ideologia política concreta de cara ao público. Queremos
que ACousa seja um espaço seguro e respeitoso para todes. Para nós nom é política defender os direitos humanos das pessoas, se para alguém o for, será o seu problema.
Como decidides os temas de que escrever?
Partimos sempre de um tema mensal e a partir disso organizamos todos os conteúdos. Procuramos estabelecer os temas com bastante antelaçom –como dous ou três meses antes– e assim ter tempo suficiente para produzir e montar todos os conteúdos. Aínda assim, o que fazemos costumam ser temas que nos interessam pessoalmente e, como antes que companheiras somos amigas, calha que as quatro compartilhamos muitas cousas. Compartilhar gostos é chave parfazer progredir projetos, mas quiçá também fai com que nos afastemos de temas que nom conhecemos tanto ou que nom som do nosso interesse pessoal.
Fazedes conteúdos com umha linha de estilo que lembra um pouco às series dos 80 e é muito colorida, a que se deve?
A imagem corporativa de ACousa foi um processo longo e tudo está pensado ao milímetro. A ideia era transmitir felicidade com brilhos e cores, chamar a atençom e deixar claro qual é o nosso público objetivo. As décadas de 70 e 80 tenhem umha estética que vai acorde com tudo isso que queremos transmitir e, além do mais, quando começamos o projeto eram as que mais soavam. Se hoje tivéssemos que voltar a começar de zero escolheríamos outra linha estética? Pode ser. Quem sabe. De todos os modos, temos de admitir que, ao pertencer todas à geraçom Z, acabamos seguindo esses padrons de estilo e temática. Um fun fact é que toda a estética foi buscada depois de ver a portada de um livro que nenhumha tinha lido naquela altura.
Acousa é umha revista sobretudo de redes sociais?
É única e exclusivamente de redes sociais. Tínhamos claro desde um início que o nosso público objetivo se move nessas plataformas e descartamos totalmente um hipotético formato impresso, tanto polo custo como polo facto de que queremos, sobretudo, conteúdo audiovisual. Ainda assim, temos um website que engloba tudo. Usamo-lo um bocado como coletor de conteúdos, mas temos de reconhecer que nom lhe damos muita atençom. É uma cousa que temos de melhorar, mas é normal que nos esqueçamos quando a nossa forma de difusom som as redes sociais. Temos web mas, igual que o nosso público, somos geraçom Z e nom consumimos tanto esse formato.
